MARBISUK SONGON ULOK

Di na sahali, lao do sada na poso ni Tuhanta manopot sada halak na marsahit tu sada rumah sakit. Nang pe naung di rumah sakit jala diubati dokter halak na marsahit i, tong dope lao keluargana mangalului ubat tu datu dohot tu pangubati “alternatif”. Dipatorang na poso ni Tuhan i ma tu ibana na so dihalomohon Tuhan Jesus hita jolma mangido pangurupion tu datu. Jadi dialusi keluarga ni na marsahit i ma songon on: “Didok Tuhanta do asa marbisuk hita songon ulok jala marroha songon darapati. Jadi, ingkon baenon do angka usaha-usaha na asing lao mangalului hamamalum ni sahit. Dang boi iba sai so!" Mansai godang do dongan Kristen na mamintori dirina molo lao tu datu dohot pandohan songon alusni keluarga ni na marsahit ondeng. Hape molo tatangkasi Bibel, ndang adong didok Tuhan Jesus songon i. Molo boi buka hamu ma Bibelmuna asa rap manangkasi hita. la pandohan na adong hata ulok dohot darapati tarsurat do i di Mateus 10 ayat 16. Songon on ma tarsurat di si: Husuru do hamu songon biru-biru tu tonga-tonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati! Molo di Bibel hata Batak Toba siganup ari tarsurat songon on: Parrohahon hamu ma on: Husuru do hamu songon biru-biru tu tongatonga ni serigala. Ingkon tongtong do hamu jaga songon ulok, jala ias songon darapati. Alkitab dalam bahasa Indonesia sehari-hari manurathon songon on: Perhatikanlah ini: Aku mengutus kalian seperti domba yang tidak berdaya ke tengah-tengah serigala ganas. Kalian harus waspada seperti ular dan tutus hati seperti burung merpati.

2

Jadi molo tapamanat na tolu ayat na di ginjang i, dang adong hata na mandok marbisuk songon ulok! Alai asa jaga, waspada manang sigop hita maradophon serigala, manang binatang sipamolgak. Ise do tahe sipamolgak didok di Bibel? Sibolis do sipamolgak! Jadi ayat i pasingothon hita do asa jaga, waspada manang sigop hita maradophon sibolis! Dang adong hubungan ni ayat i tu na mangalului hamamalum ni sahit. Lam ambal tahe molo tajaha angka ayat namanjoloani ayat i. Gabe tangkas idaonta, ia ayat i tonani Tuhan Jesus do i tu angka siseanNa, ditingki diparborhat Tuhan Jesus angka sisean i lao marbarita nauli. Jadi bohal partondion ni sisiean i do ayat i di tingki pararathon barita nauli. Asa jaga do sisean i maradophon sibolis ditingki na marbarita nauli nasida. Dang adong hubungan ni ayat i tu bisuk ni hajolmaon lao mangalului hahipason ni pamatang.

Singotsingot do ayat i tu hita asa jaga, waspada manang sigop hita maradophon sibolis. Alani i, maralo do ayat i tu roha ni si bolis. I do umbaen na dipapilit sibolis ayat i, asa unang mabiar hita to sibolis jala asa unang mabiar hita mangido pangurupion tu datu. Ai songon i do na jolo dipatupa sibolis tu si Hawa. Di papilitpilit sibolis do hata ni Tuhanta lao mandabuhon si Hawa tu bagasan dosa. Mansai malo do si bolls papilitpilit hatani Tuhanta. Pamanat hamu perbedaan ni hata ni Tuhanta dohot hata ni si bolis tu si Hawa songon na tarsurat di toru on: Hatani Tuhanta tu si Adam dohot Si Hawa songon on do:

"Jadi do panganonmu sian nasa hau dibagasan porlak on. Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho. " (1 Musa 2: 16-17) Hape di tingki, diunjuni sibolis si Hawa, songon on do didok sibolis tu si Hawa: "Atehe tongon do didok Debata, na so jadi panganonmu sian saluhut hau angka na di porlak on?" (1 Musa 3:1) Mansai ambal do tona ni Tuhanta dohot nanihatahonni sibolis i. Alai dijalo rohani si Hawa do hata na pinapilit ni sibolis i, gabe madabu ma si Hawa tu bagasan dosa. Ihutma muse madabu tu dosa dongan sajabuna, si Adam. Sahat tu sadari on tong-tong dope mangula sibolis lao palipehon hata ni Tuhanta. Tuhan Jesus mandok. "Husuru do hamu songon biru-biru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati!" Si bolis papilit hata i di rohani jolma, gabe didokma: "Ingkon marbisuk do ho songon ulok jala marroha songon darapati." Mansai ambal do nadua pandohan i. Molo so manat hita, songon si Hawa i ma hita madabu tu bagasan dosa. I do alana dipasingot Tuhanta hita asa jaga, songon na tarsurat di 1 Petrus 5: 8. Torang marohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna. Hita pe, molo dijalo rohanta hata ni si bolis na papilit hata ni Tuhanta, isara Mateus 10:16 nangkin, tadok ingkon marbisuk songon ulok, hape dang adong songoni didok Tuhan Jesus, madabu ma hita tu bagasan dosa pardatuon. Dang holan hita madabu tu bagasan dosa i, alai mangihut ma muse dongan sajabunta dohot sisolhotta. Antong molo hea hita mardatu, tapatoru ma rohanta mangido hasesaan ni dosa tu Tuhanta Jesus. Ai mardosa do hita molo lao mangido pangurupion tu datu manang tu "tondi ni na mate". Songon on didok Tuhanta tu angka na olo

3

mangido pangurupion tu datu manang tu “tondi ni na mate”: Na so tupa adong jumpang di tongatongamuna sahalak na pabolushon anakna manang boruna sian api, manang halak pangarunding manang sijujur ari, manang sitabasi ulok manang parsibalik mata. Manang sibahen panutupi, manang partondung, manang na manungkun begu ni na mate. Ai marbias-bias situtu do rohani Jahowa mida saluhut halak, angka na mangulahon si songoni. ....... (5 Musa 18: 10-12) Tung sura marballk manang ise marsungkun tu halak pangarunding, manang tu halak partondung, asa mangihuthon parmalonon nasida, ingkon Ahu manuju Bohingku mangalo jolma sisongoni dohot manianhon lbana sian tongatonga ni bangsona. (3 Musa 20: 6) la pangarunding, sijujur ari, sitabasi ulok, parsibalik mata, sibahen panutupi dohot partondung, goarni angka datu do i. Jadi mansai magigi huhut tarrimas do rohani Tuhanta mamereng halak na olo lao mangido pangurupion tu datu dohot tu halak na marpanungkun tu begu ni na mate. Antong, molo hea hamu mardatu manang marpanungkun tu begu ni na mate, huhut papilit hata ni Tuhanta lao mamintori ulaon pardatuon i, topoti hamu ma dosa i. Parasiroha do Tuhan Jesus, setia do lbana manesa dosani halak na olo manopoti dosana. Molo olo do hamu, tarsongon on ma tangiangmuna lao manopoti dosa i: Ale Tuhan Jesus Kristus, nunga mardosa ahu ala hea ahu mangido pangurupion tu suruan ni sibolis, i ma ditingki laho au tu sada datu na margoar ………………………. Di huta ………….. Hupapilit do nang hataM lao mamintori pardatuonki. Asi ma roham di ahu, sesa ma Tuhan Jesus dosangki. Buri ahu Tuhan dohot mudarmu na badia i, jala marjanji do ahu na so ulahononku be angka ulaon pardatuon. Paloas ahu Tuhan mamakke huasom laho manggotaphon parsaoranku dohot suruan ni sibolis na mandongani datu i, dohot pabalihon angka tondi na jahat na binoanna tu rohangku. Ale suruan ni sibolis na mandongani datu …………… di huta …………….. Mulai sadari on, mangasahon Goarni Tuhan Jesus, hugotaphon parsaoranku dohot ho, lao ho tinggalhon au, dang olo be ahu huasoonmu. Mangasahon Goarni Tuhan Jesus, nasa pangidoanku tu ho na jolo i hubatalhon. Nasa pangurupionmu hutulahi jala sude parpadananta hugotaphon. Holan tu Tuhan Jesus na ma ahu marpadan. Sude angka tondi na jahat na pinamasukmu tu rohangku, mangasahon Goarni Tuhan Jesus hupabali sian rohangku. Ale Tuhan Jesus, asi ma roham di ahu, palua ma ahu sian nasa torutoru alani dosangki, jala gantima torutoru i dohot angka pasupasu na sian Ho. Mian ma Ho tongtong di bagasan rohangku. Ho ma na mangarajai diringku. Togutogu ahu mangulahon angka lomo ni roham. Mauliate ma di Ho Tuhan Jesus. Amin. Bonggas L Tobing Jl Perjuangan 9, Tj. Rejo Medan 20122