belajar-adat-batak

Jolo tinittip sanggar baen huru-huruan, Jolo sinukkun marga asa binoto partuturon

Page 1 of 9 Khusus untuk kalangan sendiri, Dapat dikembangkan sesuai keperluan Dapat di download dari http://www.hsirait.wordpress.com

ADAT BATAK www.hsirait.wordpress.com

Umpasa dohot umpama somal do tabege manang tahatahon di angka ulaon adat, di

ulaon las ni roha manang di ulaon arsak ni roha. Somalna, tarida ma i di tingki na

marhata si gabe-gabe dohot mangampu. Na naeng dohonon di son, asa tangkas nian

taboto jala taantusi aha do tujuan dohot makna ni hata umpasa i, songon i nang

hata umpama. Alana, sasintongna, asing do lapatan manang pangantusion ni hata

umpasa dohot umpama.

Andorang so sahat hita tu si, adong do niida sian angka dongan na mansai malo

manghatahon angka hata umpasa dohot umpama i ma songon bunga-hunga dohot

sira ni angka panghataion di ulaon i. Tabo tutu begeon jala mangolu nihilala

panghataion i, lumobi molo tarida hata pandohan na masialus-alusan. Alai, adong do

muse niida angka donganta naeng pasahathon hata umpasa, hape nanidokna i sian

hata umpama. Songon i sebalikna, naeng mandok hata umpama do nian ibana, hape

dihatahon sian hata umpasa. Sada kenyataan do i di tonga-tonga ni halak Batak,

alana sipata disadari manang ndang, jot-jot do disarupahon pangantusion ni hata i.

Mardomu tu si, asa tahatahon ma nian hata umpasa dohot umpama i hombar tu

rumang dohot ruhut ni angka ulaon, songon i di situasi manang hadirion ni keluarga

na naeng manjalo hata i. Misalna, adong pamoruonta naung matua, nunga

marpahompu nasida sian anak dohot sian boru. Naeng pasahathon hata si gabe-

gebe, hata pasu-pasu ma hita tu nasida di ulaon si las ni roha, ala dipatupa nasida

partangiangang (pengucap-an syukur) jala nunga tamat anak siampudanna sian

singkola kedokteran. Pasahaton ma tu nasida hata umpasa na hombar tu ulaon i

dohot tu hadirion nasida. Unang ma tadok tu nasida: songan hata ni umpasa ma

dohononhu amang boru: Bintang na rumiris tu ombun nasumorop, anak pe antong

riris, boru pe antong torop. Hata umpasa si songon i denggan ma antong tu angka

keluarga naumposo. Alai, molo tu keluarga naung antar matua, songon pamuronta

nangkin, dohononta ma: Andor halumpang ma togu-togu ni lombu, andor hatiti

togu-togu ni horbo. Sahat ma hamu saur matua pairing-iring pahompu sahat tu na

marnini marnono.

Laos songon i muse unang ma nian tabahen-bahen (dikarang-karang) sandiri hata

umpasa manang umpama i, molo so taantusi lapatan dohot makna ni na tahatahon i.

Tumagon ma tadok hata angka nauli nadenggan tu angka tuturta marhite hata na

sian Tuhanta, molo so taboto dope angka sidohononta marhite-hite hata umpasa

manang umpama.

Sada nari naporlu muse sidohonon, molo angka hata umpasa dohot umpama,

somalna sian angka horong ni hula-hula dohot angka tulang do pasahathon i tu

pamoruonna, manang sian angka natua-tua tu ianakhonna. Sipata, nian, godang do

taida di tingki on adong sian horong ni pamoruon na pasahathon hata umpasa dohot

hata umpama tu hula-hula manang tulangna, tarlumobi di tingki mangampu hata.

Nadenggan ma i tutu. Alai, adong muse do mandok hata sian boru ala rap uduran ni

hula-hula nasida mandok hata i.

Na naeng dohonon di son: molo sian posisi ni boru do hita pasahat-hon hata umpasa

manang umpama, asa dumenggan, tama hita nian jolo mangido marsantabi baru pe



asa tahatahon si dohononta. Alana, songon naung tangkas taboto, molo hata

umpasa i, i ma hata pasu-pasu jala mangalean angka hata pasu-pasu somalna

ingkon sian angka horong ni hula-hula dohot tulang. Adong hata ni Tuhanta na

mandok: Jadi sandok ndang targagaon, nasumangap i do mamasu-masu na

ummetmet. (Memang tidak dapat disangkal, bahwa yang lebih rendah diberkati yang

lebih tinggi -Ibrani 7: 7). Jala dumenggan muse tahe, molo di tingki na pasahathon

hata i sai dimulai dohot pandohan: songon hata ni natua-tua ma dohononhu, sai

asi ma roha ni Tuhanta, dohot angka na asing.

Sian angka hatorangan nangkin boi ma dohonon di son, ia hata umpasa i ma angka

hata pasu-pasu na mardongan harapan, pangidoan tu Tuhanta Debata asa dilehon

angka nauli dohot nadenggan di ngolu ni angka tuturta. Boi do i hahipason, ganjang

ni umur, hagabeon, dohot angka na asing.

Alai, molo hata umpama, angka hata tudos-tudos manang hata poda na mardongan

harapan do i.

Contoh: Molo litok aek di toruan, tingkiron ma tu julu.

Pantun do hangoluan, tois hamagoan

Marbagi di na otik, marbagi di na godang.

Namalo ma tutu ompunta na parjolo i mambahen angka rumang, ruhut ni angka

ulaon dohot angka hata i, na gabe songon angka falsafah hidup, identitas, budaya di

hita halak Batak na porlu lestarihononhon asa adong warishononta tu angka

ianakhonta.

Sahat ma hita tu impola ni panghataion marhite hata umpasa dohot hata umpama.

Alai, molo tung hinatahon pe di son asa sidok boti jala marboha bahenon ma hita di

si. Pinatupa do di son hombar songon na dihatahon di angka ulaon nasomal

taulahon, i ma di las ni roha manang di ulaon arsak ni roha.

1. ANGKA HATA UMPASA

1. DI NA PASAHATHON ULOS TU PENGANTIN:

Di ginjang ma ia arirang di toru panggonggonan

Badanmuna ma na sora sirang, tondimuna masigomgoman.

Tubu ma si marlasuna di Dolok Purbatua

Sai ganjang ma umurmuna, sahat tu na sari matua

Bintang na rumiris, ombun na sumorop

Tubu ma anak di hamu riris, boru pe antong torop.

Tangki jala ualang, galinggang jala garege

Tubu ma di hamu anak partahi jala ulubalang

dohot boru namora jala pareme

Tubu ma tambinsu di toru ni pinasa

Tubu ma di hamu anak nabisuk dohot boru nauli basa.

Eme sitamba tua parlinggoman ni siborok,

Sai dilehon Debata ma di hamu tua, jala hot ma hamu diparorot.

2. DI NA PASAHATHON ULOS TU NATUA-TUA NI HELA (SI JALO BARA)

DOHOT SI ANGKA JALO ULOS SUHI NI AMPANG NA OPAT.

Dolok ni Purbatua jonok tu si borotan



Sai sahat ma hamu saur-matua, tiur di pansamotan

Andor halumpang ma togu-togu ni lombu, andor hatiti togu-togu ni horbo

Sai ganjang ma umurmu pairing-iring pahompu sahat ma tu na marnini marnono.

Bona ni Aek Puli di Dolok Sitapongan

Sai ro ma tu hamu angka nauli, jala sai dor nang pansamotan.

Binanga ni Sihombing binokkak ni Tarabunga,

tu sanggar ma amporik tu lubang ma satua,

Sinur ma pinahanmuna, gabe na niulamu dipasu-pasu Tuhanta.


Amanta Debata do si lehon tua, luhut ma hamu diparorot.

Sahat solu sahat tu Tigaras,

Leleng hamu mangolu, gabe jala horas.

Marmutik ma lasiak dompak mata ni ari,

Manganju ma hamu di borungku parumaenmi, arian dohot botari.

Hariara ma bonana, hariara ma nang bulungna,

Gabe jala horas hula-hulana, songon i nang pamoruonna.

3. HATA UMPASA SIAN HULA-HULA DOHOT HORONG NI TULANG.

Hot pe jabu i sai tong do i marbulang-bulang,

Tung sian dia pe mangalap boru bere i, sai hot do i boru ni tulang.

Dangka ni bulu godang tanggo pinangait-aithon

Dilehon Debata ma di hamu tubuan anak dohot boru,

si tongka panahit-nahiton.

Andos ras ma tu andor ris, tubu di huta Purbasinomba,

Sai horas-horas ma hamu jala torkis-torkis, ditumpak asi ni roha ni Tuhanta.

Binsar mata ni ari, poltak mata ni bulan,

Sai tubu ma di hamu boru namalo mansari

dohot anak na gabe raja panungkunan.

Giring-gring ma tu gosta-gosta,

tu boras ni singkoru,

Sai tibu ma hamu mangiring-iring pahompu,

tibu mangompa-ompa anak dohot boru.

Sahat-sahat ni solu, sahat ma tu bontean,

Sahat ma hamu leleng mangolu, sahat tu parhorasan panggabean.


Debata do si lehon tua, horas hamu diparorot.

4. HATA UMPASA DI NA PAAMPUHON HATA DOHOT MANGAMPU HATA.

Aek marjullak-jullak, marjullak-jullak sian batu, tinahu tu batu-batu.

Angka hata nauli, hata pasu-pasu naung hupasahat hami tu hamu,

ampu hamu ma i di tonga ni jabu.

Naung sampulu pitu jumali sampulu ualu

Hata nauli, hata pasu-pasu, ampu hamu ma di tonga ni jabu.

Turtu ma inna anduhur, tio ma ninna lote,

Hata nauli, hata pasu-pasu, sai unang muba sai unang mose.

Marmutik ma inggir-inggir, bulung na i rata-rata,

Hata nauli, hata pasu-pasu naung pinasahatmuna, napasauthon ma hata ni Debata.

5. HATA UMPASA DI NA MANGINGANI MANANG MANURUK JABU.

Labu pe labu i, ndang asal suanhononhon,

Jabu pe jabu, ndang asal inganan.



Mabaor aek puli sian dolok ni Simamora,

Sai hot ma jabunta on bagas na uli, ingananmu marlas ni roha.

Tangkas do jabu suhat, laos tangkas do jabu bona,

Sai tangkas ma hamu dung maringanan di jabu on maduma,

tangkas nang mamora.

Andor ras ma tu andor ris di tombak ni Purbasinomba,

Sai horas-horas ma hamu torkis-torkis,

tumpahon ni Debata namartua.

Jongjong di Dolok Purbasinomba, manatap tu Panamparan,

Sahat ma hamu saur-matua mangingani jabu on

dihaliangi angka pomparan.

Sahat-sahat ni solu toho di rondang ni bulan,

Sahat ma hamu leleng mangolu mangingani bagas on,

sai diiring-iring Tuhan.

Eme si tamba tua parlinggoman siborok,

Sai dilehon Tuhanta ma di hamu tua, hot ma hamu di jabu on diparorot.

6. HATA UMPASA DI ULAON NA TARDIDI

Tubu ma tambinsu di dolok ni Pangaribuan,

Sai anak nabiusk ma ibana,

anak na gabe si pajoloon.

Dangka ni hariara ma ni pangait-aithon

Simbur ma ibana mangodang, sitongka panahit-nahiton.

Horbo ni Sibuluan manjampal di balian,

Sai dapot ma angka naniluluan,

sai tiur ma nang pansarian.

Habang ambaroba di atas ni Sibuntuon,

Sai burju ma ibana marroha,

gabe jolma si tiruon.

Dolok ni Hutanauli hatubuan ni si marlasuna,

Goar nauli ma goarna i, ]

donganna gabe jala mamora.


Sai dilehon Debata ma di ibana tua,

imbur magodang diparorot.

7. HATA UMPASA DI NA PASAHATHON ULOS MULA GABE

Sanjongkal urat ni ri,

tolu jongkal urat ni singkoru,

Ulos mula gabe naung pinasahat i,

sai saur ma i di hamu,

mangulosi anak dohot boru.

Tubu ma lata di toru ni bunga-bunga,

Tubu ma anak na marsangap di hamu dohot boru na martua.

Habang binsak-binsak laos mangihut ambaroba,

Sai tibu ma ro na tapaima,

jala dapot nahinirim ni roha.

Tangki ma jala ualang,

galinggang jala garege,

Sai tubu ma di hamu anak partahi jala ulubalang,

dohot boru namora jala pareme.

Eme si tambatua ma parasaran ni siborok,

Sai dilehon Debata ma di hamu gogo dohot tua,



hot ma hamu diparorot.

Obuk do jambulan nanidandan bahen samara,

Molo mamasu-masu hula-hula,

padao sahit dohot mara.

Hotang do binebe-bebe,

hotang nipulos-pulos,

Unang hita mandele ai adong do tudos-tudos.

Bagot na madung-dung ma tu pilo-pilo na marajar,

Sai salpu ma angka nalungun,

sai ro ma angka najagar.

Tombak ni Simalungun parsobanan ni Simamora,

Sai hatop ma salpu angka nalungun,

jala hatop ma ro si las ni roha.

Balga tiang ni ruma, umbalgaan tiang ni sopo,

Nunga ganjang umur ni naung jumolo i,

sai gumanjang ma umur ni angka naumposo.

Tuak natonggi ma tu bagot si balbalon,

Tung paet di tingki angka na salpu i,

sai ro ma angka natonggi tu joloan on.

Tinapu bulung siarum bahen uram ni pora-pora,

Nahasit i tibu ma malum,

jala tibu ma ro si las ni roha.

Eme sitambatua parlinggoman siborok,

Sai dilehon Tuhanta ma di hamu tua,

jala sude hamu sai diparorot.

8. ANGKA HATA UMPASA DI HUHUASI NI SIPANGANON

Si titi ma si hompa, golang-golang pangarahutna,

Otik so sadia pe na tupa,

sai godang ma pinasuna.

Bagot na marhalto ma tubu di robean,

Horas ma namanganhon, horas namangalean.

Huta Tanobato parasaran ni leang-leang,

Horas ma hami namanjalo,

horas ma di hamu namangalean.

Otik si butong-butong, godang si pir ni tondi,

Otik so sadia na boi hupatupa hami,

pamurnas ma i tudaging,

saudara tu bohi,

si palomak imbulu ma i,

si paneang holi-holi.

2. ANGKA HATA UMPAMA

Aek godang tu aek laut,

angka dos ni roha do si behen na saut.

Si hikkit si nalenggam,

tapillit ma nadumenggan.

Eme na masak di gagat ursa,



I ma na masa (denggan) i ma niula.

Sinuan bulu sibahen na las,

Sinuan adat dohot uhum sibahen na horas.

Ompu raja di jolo martungkot sialagundi,

Angka adat nauli napinungka ni ompunta na parjolo,

siihuthonon ni hita na di pudi.

Baris-baris ni gaja di rura Pangaloan,

Molo marsuru raja,

dae do so oloan.

Pat ni gaja tu pat ni hora,

Angka anak ni raja jala pahompu ni namora.

Asing dolok asing duhutna,

Asing luat, asing ruhutna.

Sise do mula ni hata,

sungkun mula ni uhum,

Gokhon sipaimaon jou-jou sialusan.

Sotongka do mulak tata naung masak,

Mulak marimbulu naung tinutungan.

Unang songon tagading,

marguru tu anakna.

Piltik ni hasapi do tabo begeon ni pinggol,

Piltik ni hata sogo begeon.

Madekdek jarum tu napotpot,

Ndang diida mata,

diida roha.

Sian hatorangan dohot angka contoh ni hata umpasa dohot umpama na pinatupa di

buku on, didok roha nian naeng manambai angka naung taboto. Jala tapasahat ma

angka hata pandohan i marhite-hite lambas ni roha jala hombar tu rumang dohot

bentuk ni ulaon i.

Di na laho pasahathon hata hita di sada-sada ulaon, taparate-atehon ma situasi

dohot kondisi ni tuturna na marulaon, songon i kondisi dohot hadirionta be. Molo

poso dope hita, nang pe sian horong ni hula-hula manang tulang, asa malo ma hita

manempathon diri. Lapatanna, nang pe hita apala tampuk, nampunasa ugasan di

ulaon i, alai porlu do pasangap-onta molo adong dope natua-tua rap dohot hita di si.

Sada na porlu sibotoonta muse, molo angka hata umpasa i boi do berkembang

mang-ihuthon angka hamajuon ni zaman dohot kondisi. Na porlu, asalma nanidokna

i marlapatan na bagas, mura antusan. Alai, molo angka hata umpama, bentuk dohot

hatana, hira bersifat statis do i. Ndang boi i dika-rang-karang. Alana, songon fasafah

manang poda do i di hita.

Songon i ma jolo na boi pinatupa di tingki on. Horas ma di hita.

RUJUTNI PARJAMBARON

Ruhut parjambaron juhut godang do variasina taida di ulaon adat-

paradaton, hombar ma i tu rumang ni ulaon, luat ni namarulaon dohot

situasi, kondisi, tempat, songon i nang di panjuhutina.



Didok natua-tua, sai jolo diseat hata asa diseat raut, namar-lapatan do i asa jolo

dialap hata dos ni roha ma asa dibagi parjambaran juhut. Songon i muse nang di

hata ni natua-tua namandok: Asing dolok asing duhutna, asing huta (luat)

asing do nang ruhutna. Sudena i manghorhon tu nauli nadenggan do molo dapot

dos ni roha sian panghataion. Ai mansai arga situtu do hata, jala sasintongna ndang

apala jambar juhut i na gabe motivasi ni si jalo jambar, alai hata na masipaolo-oloan

jala masipasangapan.

Adong do sipata tabege di sada-sada ulaon las ni roha manang arsak ni roha, hurang

denggan ulaon ala ni pambagian jambar juhut.

Molo di hita na di tano parserahan on, khususna Jakarta sekitarna, ndang apala

tapersoalhon be jambar i asalma proses manang ruhut pambagianna suman tu ulaon

i. Gariada tahe adong do sijalo jambar pintor dilehon jambarna tu donganna, dohot

pertimbangan asa so boi be ibana mangallang jagal, manang mabiar basi manang

busuk jambar i ala leleng dope ibana mulak tu jabuna, dohot angka naasing.

Adong do pandohan na jot-jot tabege taringot di ruhut pambagian jambar juhut, ima

hata namandok: Sidapot solup ma hami. Sada pandohan na raja ma i tutu di halak

Batak, asalma laos raja sian mula ni panghataion jala hombar tu parhundulna.

Namarlapatan, molo sian horong ni suhut paranak do pintor mandok si dapot solup

ma hamu tu hula-hulana, so jolo dialap hata naelek, songon nahurang hormat jala

hurang raja do panghataion i. Alai, molo sian horong ni hula-hula do namandok

sidapot solup ma hami tu pamoruonna, mansai uli jala denggan ma begeon.

Ala ni i do sipata di ulaon las ni roha manang ulaon arsak ni roha (ulaon sari-matua

manang saur-matua) dipatupa ulaon martonggo raja. Alana, gabe hira adong do

panghataion sahat tu panjuhuti ni ulaon dohot pambagian jambar juhut.

Molo taida di ulaon adat na masa di tano parserahan on, angka si jalo parbagian

jambar juhut di ulaon adat-paradaton i ma:

jambar ni hasuhuton dohot namarhaha-maranggi,

jambar ni boru/bere,

jambar ni dongan sahuta,

jambar ni pariban,

jambar ni hula-hula (hula-hula ni suhut; namarhaha-anggi, anak manjae)

jambar ni tulang (tulang ni ama hasuhuton dohot tulang ni ina hasuhuton)

jambar ni bona tulang (tulang ni ompu suhut)

jambar ni bona ni ari (hula-hula ni ompu suhut)

Nian adong dope angka si jalo jambar i ma: tu pangula ni huria, punguan dohot

angka naasing dope. Alai, nauli ma saluhutna i jala disesuaihon ma pambagian i tu

bentuk ni ulaon dohot panjuhutina.

Saonari porlu ma muse botoonta angka dia ma jambar sipasahaton tu horong ni si

jalo jambar i.

Hombar tu si, parjolo ma pinatorang saotik taringot tu na mang-hasuhuthon, na

marhadomuan tu tahapan manang proses ni namarbagi jambar juhut.

Molo sian daerah Silindung-Humbang sekitarna do namarulaon (hasuhuton), sai

jumolo do dipasahat jambar taripar tu horong ni hula-hulana dohot tulang. Jadi

parpudi do jambar dibagi tu hasuhuton.



Alai, molo namarulaon (hasuhuton) sian Toba sekitarna, sai jumolo do dibagi nasida

jambar tu suhut namarhaha-maranggi asa mangihut jambar taripar tu hula-hula

dohot tulang. Songon i jambar osang sai tu boruna do i dipasahat. Hape molo di

Silindung-Humbang, jambar osang tu hula-hula do dipasahat. Alai sudena i sai

manghorhon tu nauli nadenggan do molo sian angka dos ni roha.

Pambagian jambar juhut di ulaon pamuli boru/pangolihon anak alap jual manang

taruhon jual na masa jala somal taulahon di Jakarta sekitarna, hira songon on ma.

1. Sibagi dua do tudu-tudu ni sipanganon naung dipasahat Paranak tu Parboru.

Nang pe naung dipasahat Paranak tu Parboru tudu-tudu ni sipanganon i marhite-

hite hata manang pandohan na elek di na pasahathon, alai dung sidung

marsipanganon disungkun suhut manang Raja Parhata ni Parboru do muse

Paranak taringot tu tudu-tudu ni sipanganon i, songon naung pinatorang di

panghataion di ulaon marhata sinamot. Alai, somalna, molo ihur-ihur sai jambar

tu pihak parboru do i, nang pe diulaon taruhon jual, i ma ulak ni tandok ni

parboru.

2. Dung dibagi dua tudu-tudu ni sipanganon i, dipasahat Parboru ma muse jambar

bagian ni Paranak, hombar tu panghataion dohot dos ni roha nasida. Dung i

dibagi Parboru dohot Paranak ma muse jambar i tu angka tuturna be.

Catatan:

Masa niida hira dipangido Paranak sian Parboru saotik sian jambar ihur- ihur di

nasida asa adong bagionna tu tuturna (dongan tubuna).

Di ulaon pesta unjuk somalna dipatupa sampe 8 (ualu) soit, asa 4 (opat) soit di

Parboru, 4 (opat) soit di Paranak, jala di deba ulaon osang pe dibagi dua do.

Masa do muse niida dipasahat Parboru jambar juhut tu haha parhundulna (tulang

ni Pangoli), jala nadenggan ma tutu i.

3. Pambagian jambar sipasahataon ni Parboru dohot Paranak hira songon na adong

di table berikut ma:

Jambar juhut sipasahaton ni Paranak:

Sijalo Jambar Silindung/Humbang Toba

Suhut dohot Namarhaha-anggi soit, pohu soit, pohu

Sude horong ni hula-hula somba-somba somba-somba

Boru/Bere namarngingi

(hambirang)

- namarngingi (hambirang)

- osang

- Pariban,

- Pangula ni huria,

- Dongan sahuta,

- Punguan

dibuat sian soit, pohu dibuat sian soit, pohu

Jambar juhut sipasahaton ni Parboru:

Sijalo Jambar Silindung/Humbang Toba

Suhut ihur-ihur, soit ihur-ihur, soit

Hula-hula Osang namarngingi,

Tulang namarngingi (siamun) namarngingi,somba-

somba

Boru/Bere namarngingi (hambirang) osang



- Hula-hula ni namarhaha-anggi,

- Hula2 ni anak manjae

- Tulang rorobot,

- Bona Tulang,

- Bona ni ari

somba-somba

somba-somba

- Pariban,

- Pangula ni huria,

- Dongan sahuta

soit, pohu

soit, pohu

- Punguan dibuat sian jambar ni

suhut dibuat sian jambar ni

suhut

1. Di ulaon tardidi, malua, manuruk jabu, molo jambar ihur-ihur hot ma i di

hasuhuton. Osang, namarngingi parsiamun, dohot somba-somba tu horong ni

hula-hula dohot tulang. Soit ma tu dongan sahuta dohot pariban. Namarngingi

parhambirang ma dipasahat tu boru/bere.

2. Di ulaon patua hata/marhusip, pasahat ulos mula gabe, paebathon anak buha

baju, ia parjambaron pada prinsipna hira-hira surung-surung ni hula-hula ma i.

Alai somalna, sian hula-hula dengan do marnida situasi. Molo tung pe didok

paranak (pamoruon nasida) jambar surung-surung, boi do i dialap hata muse.

Molo di tingki ulaon i adong angka dongan tubu ni pamoruonna i mandongani

nasida, ingkon adong ma nian tinggal sebagian jambar i sa adong lehononna tu

nasida.

3. Pambagian jambar dohot panjuhuti di ulaon sari-matua dohot saur-matua saguru

tu keputusan ni pangarapoton (tonggo raja) do i. Adong do namangalehon ihur-

ihur tu hula-hulana, ulu ma tu tulang, jala somba-somba tu horong ni hula-hula

naasing termasuk tulang dohot bona tulang.

Alai nasomal muse taulahon di Jakarta sekitarna, molo ihur-ihur hot ma i di

hasuhuton dohot namarhaha-anggi, jala jambar tu horong ni sude hula-hula dohot

tulang dipatupa sian somba-somba.

Asa nauli jala denggan ma i sude asalma sian panghataion tu dos ni roha, jolo

diseat hata ma asa diseat raut, jala taingot ma hata namandok, Hata do

parsimboraan.

NB: Unang ma nian adong sian parhata, sibagi jambar na emosi jala mamaksahon

kehendak di pambagian jambar, lumobi sian horong ni suhut. Jala naumporlu,

tapaido ma panuturion sian angka raja naro dohot hula-hula, tulang,

khususna di ulaon sari-matua dohot saur-matua. Alana, porlu ingkon

jagaonta do asa sangap suhut sihabolonan di ulaon si songon on.

belajar-adat-batak

Documents