1

PARTANGIANGAN kelUARGA DI HKBP distrik xxi banten

Tema: ”Las Ni Rora Dibagasan Tuhan I"

Ev.: Psalmen 69: 30-37 Ep.: 1 Petrus 4: 12-19

MINGGU LETARE, 22 MARET 2020

2

PARTANGIANGAN KELUARGA DI HKBP DISTRIK XXI BANTEN

Tema: ”LAS NI ROHA DIBAGASAN TUHAN I" Minggu, 22 Maret 2020

Pangaradeon : ✓ Anggota Keluarga paradehon diri laho mandohoti partangiangan keluarga,

marhite : Bibel, Buku Ende, Acara Partangiangan, dohot inganan partangiangan.

✓ Mamilit angka petugas na manguluhon di Partangiangan Keluarga on, Natoras Ama/Ina ma gabe uluan, jala sahalak manguluhon Tanging Pangondianon.

01. Joujou Tu Partangiangan (U : Uluan ; R : Ruas)

U : Huria nahinaholongan ni Tuhan Jesus Kristus. Marsomba ma hita tu adopan ni Debata, marhite partangiangan keluarga on. Dipaloas hita marparsaoran nuaeng, paboa na di tongatongata do Debata. Nang pe dibagasta be hita marparsaoran, na pasidohot do hita rap dohot dongan sa bangso marnida na masa jala patuduhon parbue ni haporseaon ta marhite pangulaon na tangkas manjagahon diri asa menghambat penyebaran Virus Corona. Porsea ma hita di Debata didok do : Ai anggo pungu dua manang tolu pe marhitehite Goarhu, sai dongananku do nasida.

R : Ale Tuhan, parasiroha jala na badia. Marpungu hami ditongatonga bagas nami on, laho marparsaoran dohot Ho. Asi ma rohaM di hami, tatap ma hami na pungu dison.

U : ”Las ni roha dibagasan Tuhan i” ima na gabe topik di minggu Letare on. Songon dia do hita marlas ni roha, ditongatonga na ta adopi nuaeng serangan Virus Corona? Par Psalmen mandok : ”Alai na dangol do ianggo ahu, jala marsingkor, sai patimbulon ni hatuaonmi do ahu sogot, ale Debata”. On do na gabe las ni rohanta, na pe dangol jala marsikor, alai haluaon na sian Tuhan I, sai hot do salelengleleng na. antong ta puji ma Tuhan ta, marende ma hita.

02. Marende BE 557 : 1 – 3 ”Dao Dumenggan”

❖ Dao dumenggan asi ni rohaM. Dao umarga sian ngolungkon. Sai pujionku ma Ho Tuhanku. Dao umarga asi ni rohaM. Ala goarMu ro do au tu Ho. Herbang tanganhu lao mamuji Ho. Dao umarga sian ngolungku. Dao dumenggan asi ni rohaM. Dao dumenggan holong ni rohaM. Dao umarga sian ngolungkon. Sai pujionku ma Ho Tuhanku. Sandok ngolungku do mamuji Ho.

3

03. Votum – Introitus – Tangiang U : Marhitehite Goar ni Debata Ama dohot Goar ni AnakNa, Tuhan Jesus

Kristus dohot Goar ni Tondi Parbadia, na tumompa langit dohot tano on. Amen.

R : Amen. U : Marlas ni roha ma hamu rap dohot Jerusalem jala marolopolop mida

ibana sude hamu, ale angka na holong roha di ibana ! Marlas ni roha situtu ma - rap dohot ibana sude hamu, ale angka na marsak roha mida ibana nesailaon ! Ai dokhononNa do angka surusuruanNa taringot tu ho, asa dijaga ho di angka dalanmu sudena. Sai tangantanganonnasida do ho, asa unang tartuktuk patmu tu batu.

R : Ida ma, Debata do hatuaonku, Ibana huhaposi, jadi ndang mabiar ahu, ai Tuhan Jahowa do hagogoonku dohot pujipujianku dohot manjadi hatuaon di ahu.

U : Unang ho mabiar, ai Ahu do siluluhon ho; nunga pola hujou goarmu, ahu nampuna ho. Ai molo dibolus ho aek, donganmu do ahu, manang ditaripari ho angka batang aek, ndang umbanganna ho. Tung sura pe mardalan ho di bagasan api, ndang mosokkononna ho, jala ndang gor ho bahenon ni dila ni api. Halleluya.

Martangiang ma hita : Ale Amanami jala Debatanami ! Na mandok mauliate do hami tu Ho sian nasa rohanami, ala disuru Ho AnakMu, Tuhan Jesus Kristus, na paluahon hami sian dosa dohot hamatean. Hupangido hami, sai patiur jala rajai ma rohanami marhitehite Tondi Parbadia i, asa unang hu rohanami mida hametmetonNa i. Urupi hami, asa lam hutanda hami Ibana Raja naung ro i, sisombaon ni sandok jolma na di liat portibi on. Amen.

04. Marende BE 86: 1+3 “Silang Na Badia I”

❖ Silang na badia i, Ho do lombulombungki, Maralohon dosa i dohot pandelean i. Di sude sitaononki, Ho ma lombulombungki.

❖ Ro do au nuaeng tu ho, Sai palambas ma roham; Nunga pola mate Ho, ala asi ni rohaM; Janghon au na dangolon, sai ulosi tondingkon.

05. Renungan Situasional Dohot Manopoti Dosa

U: Huria hinaholongan ni Tuhan i. Tadok ma mauliate tu Debata na tongtong mangaramoti hita rasirasa sadari on. Rap tapanghilalahon ma asi ni roha ni Debata na manggohi ngolunta. Di tongatonga ni partingkian hamamasa ni wabah pandemi virus Corona di portibi on nang di bangsonta, Debata ma na margogoihon jala patogu rohanta

4

manongtong joujou tu Ibana na mangalehon hahipason suang songon i sipanganon dohot siinumon. Tung na balga ma tutu pasupasuNa itajalo. Borhat sian panandaon i di saluhutna i aha ma tagamon jouhononta?

R: Ebenezer, Rasirasa nuaeng diurupi Jahowa do hita. U: Tutu, situtu. Taongkuhon do ia ngolunta ndada holan las ni roha,

marsorin do dohot parungkilon nang ragam siarsakhonon. Jala masa do nuaeng biar ni roha sahat tu na biahaton siala ni virus Corona. Marragam do pangalaho ni jolma mangadopisa, jala nuaeng diuji do solidaritas ni bangsoon laho masiurupan mangadopi mara i. Marningot angka na mada i, aha ma na tama sidohononta?

R: Ebenezer, Rasirasa nuaeng diurupi Jahowa do hita. U: Naeng ma marhite saluhut angka na masa i, di las ni roha nang arsak pe,

lam pasolhothon dirinta tu Tuhanta na Basa, bona ni ngolunta jala mual ni las ni roha i, jala huhut tongtong jiujou:

R: Ebenezer, Rasirasa nuaeng diurupi Jahowa do hita. U: Songon angka na porsea dipandonganion ni Tuhan i, holan tu Ibana ma

tapasahat ngolunta. Boi tagamanon mabiar, lomos jala dihadihaon tudoshon halak na mardalan di na holom, so umboto na masa di jolona siala biar ni rohana. Alai ianggo hita angka naung pinillit ni Tuhan i, angka ianakhonNa na tarpasupasu “pir ma tondinta jala marsihohot”, unang tahutan hita, alai tapasahat ma dirinta tu Ibana ai ibana do nampuna i. Tongtong do toguonna jala tioponna tanganmu.

R: Marende BE 686: 1-2 “Ramun Do Au” ❖ Ramun do au di joloMi gok dosangki, urasi au.

O Jesus birubiru i dison do au patau ma au. ❖ Na ro do au tu joloM i, gale do au urupi au.

O Jesus ala mudarMu, dison do au patau ma au. U: Ale Amanami jala Debatanami na di banua ginjang. Parasiroha na

sumurung mida hami ! Huparhatutu jala hutopoti hami do dosa dohot pangalaosionnami na godang i di joloM. Tatap hami marhitehite asi ni rohaM, jala sesa ma dosanami saluhutna, ala ni panghophop ni Anak haholongan ni rohaM, Tuhan Jesus Kristus, Sipangolu hami.

R: Marende BE 686: 3 “Ramun Do Au” ❖ Ala denggan ni basaM i ro au tu Ho, o Jesuski.

Parbadiai ma rohangki, dison do au patau ma au. U: Debatanami, na marasiroha jala na badia, Amanami, marhitehite

Tuhan Jesus Kristus ! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa. Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalanMu na badia songon birubiru na lilu. Sai unang pabali hami sian

5

joloM ala ni dosanami i, ai ndang dihalomohon rohaM hamatean ni angka pardosa, alai hamubson ni rohana do lomo ni rohaM, asa mangolu. Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Amen!

Martangiang Dibagas Roha (Masing-masing Berdoa di dalam Hati)

U: Bagabaga ni Debata taringot hasesaan ni dosa ta! Songon on do panghaholongi ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana. (Joh. 3, 16). Hasangapon ma di Debata na di ginjang !

R: Amen ! 06. Marende BE 452: 1-2 “Na Ro Pandaoni Bolon I”

❖ Na ro pandaoni bolon i, i ma Tuhanta Jesus. Di daoni na marsahit i, hisar dibahen Jesus. Uli ni barita i, las ni roha bolon i! Sai dipuji rohangki Jesus, Jesus, Jesus.

❖ Na hansit na di rohangki dibuat Tuhan Jesus. Antong, hamuna rohangki, hatop ma ro tu Jesus. Uli ni barita i, las ni roha bolon i! Sai dipuji rohangki Jesus, Jesus, Jesus.

07. Epistel: 1 Petrus 4: 12-19 U : Ale angka haholongan, unang ma jaluk di rohamuna hamohopon i, na

ro manguji hamu; unang ma songon na sambar i di rohamuna! R : Marlas ni roha ma hamu, marguru tu saormuna di angka haporsuhon

na tinaon ni Kristus i, asa dohot hamu marlas ni roha jala mariaia, di na gabe patar hasangaponna i.

U : Martua do hamu, molo hona insak hamu ala ni Goar ni Kristus, ala songgop tu hamu Tondi hasangapon na sian Debata.

R : Unang ma adong sian hamu manaon na porsuk, ala mambunu, manang manangko manang marjahat ibana, manang ala diantoi na so ulaonna!

U : Alai molo adong na manaon na porsuk, ala halak Kristen ibana, unang ma hansit rohana; alai dipasangap ma Debata, manjujung Goar i.

R : Ai nunga jumpang tingki ni uhum madabu, mamungka sian bagas ni Debata. Alai molo jumolo tu hita, dia ma ujung ni angka na so mangoloi barita na uli na sian Debata?

U : Jala molo sihol so malua partigor i, tudia ma tagamon halak na so daulat jala sipardosa i?

6

R : Dibahen i, angka na marhaporsuhon mangihuthon roha ni Debata, dipasahat ma tondina tu Panompa haposan i, marhitehite na mangulahon na denggan.

U : ima sahatna. Martua ma natumangihon hata ni Debata jala naumpeopsa.

R : Amen 08. Marende BE 474 : 1 – 2 “Ingkon Jesus Do Donganku”

❖ Ingkon Jesus do donganku sahalakku lilu do. Raphon Jesus boi au monang talu musu i na ro. Ndang mabiar au disi, Tuhan Jesus donganki, Sai ihuthononku Jesus, oloanku nama i.

❖ Ingkon Jesus do donganku, molo marsitaonon au. Tu Ibana hutinggangkon, nasa na pasorat au. Ndang mabiar au disi, Tuhan Jesus donganki, Sai ihuthononku Jesus, oloanku nama i.

09. Tangiang Pangondianon 10. Marende BE 428: 1 ... ”Ho Na loja Ho Na Sorat”

❖ Ho na loja, ho na sorat, pos roham di Debatam! Di na hansit, di na borat, dipapita do roham. Unang ganggu rohamuna di pandok ni Debatam. PasautonNa bagabaga. Pos roham di Debatam.

❖ Asa unang be ho talu dibaen haholomon i, Bereng Jesus i, Tuhanmu, bernit na tinaonNa i. Unang ganggu rohamuna di pandok ni Debatam.

PasautonNa bagabaga. Pos roham di Debatam.

11. Jamita : Mazmur 69: 30 – 37 Dame ni Debata na sumurung sian saluhut roha, ima mangaramoti ateate nang pingkiranmuna be, dibagasan Kristus Jesus Tuhanta i. Amen. Hata ni Debata di Minggu Letare sadarion tarsurat di Psalmen 69: 30 – 37. (dijaha margantipasoring) “LAS NI ROHA DIBAGASAN TUHAN I...” Huria nahinaholongan ni Tuhan Jesus Kristus, Selamat ari Minggu Letare. Diarahon hata ni Tuhanta do hita di ombas on asa marlas ni roha dibagasan Tuhan i, hombar tu Topik / goar ni Minggu Letare: Marlas ni roha ma hamu.

7

Tapatupa do ibadah / parmingguon keluarga on di tonga-tonga ni situasi dohot kondisi na unik dohot na khusus. Topet do nuaeng dipatongon ngolunta tu angka na masa di lingkunganta, masyarakatta, bangsonta nang portibi, na so hea dope taadopi na sai laon. Di sejarah pardalanan ni hurianta HKBP, dipartingkian on dope hea hita disosoi asa patupa parmingguon di ganup ruma tangga. Jala pangalaho on ima hinorhon ni kenyataan dohot perubahan na taadopi nuaeng siala ni Virus Corona manang didok goarna Covid-19. Dipartingkian sinuaeng on torop do jolma di sandok portibion gabe mabiar jala tahutan. Mabiar jolma pajumpang dohot donganna jolma. Mabiar haruar sian bagasna. Mabiar masitabian (bersalaman). Mabiar jolma mamangke angkutan umum dohot mabiar atik tung dais tu angka boniaga naung jinama ni dongan. Adong do na mabiar manjama hepeng? Sandok biar i nunga manginona tu roha nang pingkiran ni ratusan juta sahat tu miliaran jolma pangisi ni portibion. Nian ianggo biar sinuaeng on ndada na so adong sialana. Ai didok do; ingkon mansai jamot do hita tu Virus Corona on (berbahaya situtu) jala mansai hatop do rarat. Ai angka jolma naung mangae sahit on, na boi do gabe hatop menularkan (gabe sibonsiri) ni angka virus virus na asing tu na dihumaliangta. Nunga sude hita marnida grafik partamba ni na mangadopi sahit siala ni Virus Corona. Sia (9) ari naung salpu holan 69 halak dope naung ditotophon marsahit siala ni virus Corona di bangsonta on, alai di ari Jumat 20 Maret 2020, nunga adong 309 halak di Indonesia on naung mangae sahit siala panghorhon ni virus na sian mulana i jumpang di negara Wuhan – Cina. Nuaeng, manang na piga halak nunga kondisi memprihatinkan jala na asing muse dibagasan perawatan dohot pengawasan. Pandemi (penularan) ni Virus Corona on marpanghorhon do tu sude parngoluon; Ekonomi, Sosial, Politik, kerohanian, fisik, psikologis, kemanan, pekerjaan, pertumbuhan anak-anak. Ala ni na masa on nunga be dipabotohon pamarentanta status ni bangsonta: “Bencana Nasional”. Presiden RI Ir. Joko Widodo mangarahon sude masyarakat ni bangsonta, asa dua minggu tu jolo rap hita mangotapi penularan ni virus on. Angka pangalaho na praktis na boi ulahononta hombar tu soso-soso ni President na gabe parsidohotonta mamorangi, manaluhon virus on ima marhite na manjaga jarak tu angka donganta (Sosial Distance).

8

Disosoi amanta Presiden do sude rakyat ni bangsonta Indonesia asa: “Marsiajar di bagasta be, mula ulaon sian bagasta be, marminggu/ibadah di bagasta be”. Asing ni i tajamothon ma laho mangaradoti hahipason dohot manjaga stamina ni pamatangta, asa manahan pamatangta jala margogo. Nian ndada na mura. Nian manghorhon biar. Partingkianta nuaeng mangadopi bencana. Marlas ni roha ma... ! Songon dia do hita marlas ni roha uju mangadopi hapariron (bencana). Tarbahen hita do marlas ni roha uju mangadopi biar hita? Boi do hita marlas ni roha uju dipaadophon tu hita ragam ni sunsang duri na rongom tu ngolunta? Ianggo panghilalaanta mandok ndang mungkin boi hita marlas ni roha. Marlas ni roha ma...? Songon dia ma hita boi marlas ni roha uju ganup jom sai tabege barita na martamba-tamba (puluhan sahat tu ratusan) angka bilangan ni jolma ndada holan tersangka (suspect) alai nunga menetapkan (confirmed) marsahit siala ni virus Corona. Uju sada luat manang sada bangso pabotohon “lockdown” (kuncian – melarang keluar masuk) angka jolma na asing ndang boi masuk tu luatna, jala jolma sian bangso na asing ndang boi masuk tu bangso na asing, boi do hita marlas ni roha? Isarana rupani negara Malaysia mandok “Lockdown” menutup diri nasida sian bangso na asing, jala ndang boi pangisi ni bangso na asing masuk tu negara nasida dohot sabalikna; tarbahen do songon i? Di piga minggu na salpu mansai torop dope jolma marrongoman tu kota wisata na margoar Lombardi di Italia. Torop sian portibion na marnida haulion ni kota Wisata Lombardi (keindahan alam dan kemegahan bangunan bersejarah serta situs yang menjadi kegemaran pelancong). Alai nuaeng nunga muba be inganan i gabe hira kota mati. Lombardi na gabe pusat (inganan) penyebaran ni virus corona i nunga di lockdown. Di tonga-tonga ni partingkian na songon i dijou do hita asa marlas ni roha. Boha!! tarbahen hita do i? Nda nunga maralo i tu na taadopi nuaeng di tonga-tonga ni realitas na masa? Nda nipi do i molo marlas ni roha di tonga-tonga ni biar na manosak tu ngolunta nuaeng? Ndang! Ndang nipi i. Mansai sintong joujou ni hata ni Tuhanta sadarion. Ndada songon bius (sipamate panghilalaan) na boi pamagohon aha na taadopi nuaeng joujou i. Alai sabalikna do marhitehite kesadaran penuh dohot kemauan mangadopi virus corona, dijou do hita asa marlas ni roha.

9

I do na mansai bagas jala torang dipabotohon Parpsalmen i di turpuk on. Situasi dohot kondisi di partingkianta sinuaeng on, ndada umbalga manang humassit i sian na niadopan ni parpsalmen i. Alai nang pe songon i, di ujungna margogo do Parpsalmen i pasahathon pujipujianna tu Tuhan i. Dipasangap ibana Tuhan i marhite roha mauliate. Dipamuhai ni Psalmen 69 on dipabotohon do na dibagasan hagogotan parpsalmen i. I do alana dipangido ibana pangurupion dohot haluaon sian Tuhan i. Boi do tarimangi na nidok ni parpsalmen on: “Nunga pola lonong ahu tu bagasan gambo lisop, soada hajongjongan, nunga pola tolhas ahu tu lintong laut angka na bagas i, jala dilingkupi galumbang i ahu.... mahiang aruarungku.... nunga pola lotop matangku (ay.3-4). Tung na so tahilala do. Sasintongna nunga jonok ngoluna tu hamatean (hidupnya di ujung tanduk). Ndada holan ancaman maut na niadopan ni Parpsalmen i, alai diadopi ibana do musu na mansai jongir situtu; tumorop do sian obuk ni ulungku angka na mangkosom ahu so ada paralaan, angka na gogo be mangago ahu, angka musungku pangalajak; abulongku do nang pe so hudobo. Mansai parir, dangol situtu na niadopan ni parpsalmen i; “Sai mangaranapi do matangku dompak angka dolok, sian dia do ro pangurupion tu ahu?” (Psalm 121). Ndada portibion mangalehon panghirimon tu ibana. Ndang adong jolma na boi haposan di ibana. Ai dirimpu dongan hape musu, dirimpu silehon haluaon hape pamangus. HOMO HOMILI LUPUS – Manusia menjadi serigala bagi sesama. Holan sada do panghirimonnaima Tuhan Jahowa. I do alana manontong ibana mangido pangurupion. Sai tumatangis ibana manaon parpuasaon; Dipangido ibana ditangiangna: Ale Jahowa, di tingki halehetanna; Ale Debata, sai alusi ma ahu hombar tu hasintongan ni hatuaonMi ala ni godang ni asi ni rohaM. Sai unang tabunihon bohiM maradophon naposoMon.. hapogani ma mangalusi ahu.. sai padonok ma Ho tu rohangku... sai palua ma ahu. Dipabotohon parpsalmen i sude na manosak dibagasan rohana. Pengalaman pribadi ni na porsea i dipabotohon sian tulus ni roha, ias ni roha, kepasrahan dohot panghirimon na mangolu tu Tuhan i. Di partingkian i, dihilala ibana do paboa ditangihon Tuhan i do tangiangna. Alani i dipapujipuji ibana Tuhan i, las ni roha manggohi ngoluna; jala barani ibana mandok: Pujionku ma

10

goar ni Debata marhitehite ende, jala pasangaponku ma goarna marhitehite pujipujian. Diida angka na dangol i ma i, gabe las ma rohanasida; Sai hiras ma rohamuna, hamu ale angka na mangalului Debata. Dibahen i MARLAS NI ROHA MA. Hamu nahinaholongan, Ganup angka na porsea, na boi do hita marlas ni roha di sude partingkian. Ndang adong na boi mangotapi/mangambati hita marlas ni roha dibagasan Tuhan i. Di tonga ni biar na sumalin na masa di ganup luat, huta, bangso nang portibion siala ni virus corona, rap dohot Tuhan i na boi do hita mangadopi i jala boi hita marlas ni roha. Taboto do barita panindangion ni pemain sepakbola AC Milan, Zlatan Ibrahimovic na mandok: Jika virus corona tidak datang kepadaku, aku akan mendatanginya..”. Jala na luar biasa, dipasahat ibana do pangurupionna Rp. 1,6 miliar laho mamorangi virus corona. Sada sikap na mansai togu jala na so mabiar mangadopi virus corona; di tingki na umbuk situtu dipatuduhon ibana sikap na empati, jala angka panindangion si songon i gabe las ni roha na patubuhon panghirimon. Ragam do las ni roha na boi jumpang di tonga-tonga ni kondisi na naol na taadopi di tingki on. Di tingki na parpudi on, tung mansai torop do bilangan namangalehon dukungan moril tu angka dokter nang perawat, na gabe garda terdepan laho mamorangi virus corona, lumobi ma na manghobasi penderita ccorona di RS Dr. Sulianti Saroso. Di tongoshon deba do papan bunga, jus, sipanganon, na boi mangurupi, mendukung angka para medis laho manaluhon penularan ni virus na berbahaya i. Di hita na porsea tu Tuhanta, godang do alasan asa marlas ni roha. “Marlas ni roha ma hamu dibagasan Tuhan, huulahi mandok, marlas ni roha ma hamu”. Unang ma tapasombu angka musunta i laho manggomak las ni rohanta i. Unang pasombu virus corona manggomak las ni roham. Angka anak ni Debata do hita, naung ditobus jala dipalua marhite mudar ni Kristus. Angka jolma na pinillit ni Tuhanta do hita. Asi ni roha ni Tuhanta i ma na mangarajai ngolunta. Mangolu ma hita dibagasan hamoraon, ala asi ni roha dohot dame na sian Tuhanta. Jumpang hita do las ni roha na marhadomuan tu perkembangan ni virus corona. Sasintongna, nunga dipatuduhon be tanda-tanda hataluan ni virus corona i. Di Kota Wuhan – Cina; di angka barita na salpu didok: Ndang adong be ninna muncul kasus na imbaru. Luar biasa. Molo di bulan na salpu

11

Wuhan nunga songon kota mati, alai nuaeng dilehon do panghirimon tu portibion; Corona nunga talu. Ra mansai ringkot do hita marsiajar sian rakyat ni kota Wuhan – Cina, rakyat ni Korea Selatan, Singapura, na tardok berhasil, sukses manaluhon sahit menular na songon i. Ra nunga ringkot hita asa disiplin, taat tu aturan na binahen ni pamarenta, manjaga diri sendiri, menjaga sesama kita agar tidak tertular. Las ni rohanta i mansai denggan do tapatuduhon marhite na sai manontong hita mandok mauliate tu Debata. Ibana do na paluahon hita. Ibana do na mangalehon ngolunta on, jala Ibana do na mambahen sumuang muse. Ngolunta on mansai arga situtu na gabe silehonlehon ni Debata di hita. Rap ma hita paturehonsa, mangaradoti huhut patureturehonsa. Suang le muse ngolu ni sesama hita. Tapatuduhon ma las ni rohanta i marhite sikap Empati, simpati tu angka donganta naung gabe korban virus corona. Tapadao ma sikap na diskriminatif dohot prasangka negatif tu manang ise pe na gabe korban ni virus corona i. Naeng dohot hita patoguhon dohot paposhon roha nasida (keluarga, haha anggi, lumobi ma angka korban) badai pasti berlalu, hari erah dab lebih baik akan datang sesuai waktu Tuhan). Marhitehite las ni roha dibagasan Tuhan i, porsea ma hita, sistem kekebalan ni pamatangta on gabe lam togu, lam horas; laho mangalo serangan ni virus corona dohot angka sahit na asing. Lumobi ma las ni rohanta dibagasan Tuhan i manontong do i jala ndada siala ni kondisi. Sai dipasupasu Tuhanta ma hita na patupahon ibadah on. Dipasupasu ma hita sude pangisi ni bagas on. Dilehon Tuhanta ma di hita gogo mangadopi manang aha pe angka na masa di ngolu on. Ala ni i marlas ni roha ma hita. Rap ma hita manghalashon hasintongan on marhitehite senyuman.

Praeses HKBP Distrik XXI Banten

Pdt. Dr. Deonal Sinaga.

12

12. Marende BE 769 : 1 … “Tu Debata Do Panghirimonhi” (Persembahan) ❖ Tu Debata do panghirimonhi, Di tano laut nang awangawang i

Ibana do haposanhi, Tongtong do diramoti langkangki Reff. Torop pe mara manahopi au, Debatangki do sumarihon au Pos rohangki, sonang do au, Ibana do na mandongani au

❖ Amporik i nang bungabunga i, Ro di sude na tinompaNa i Na metmet nang na balga i, Ibana do na marmuduhon i

13. Rap Mandok : Tangiang Ale Amanami Mangendehon : Amin, Amin, Amin!

=======================================================

Pelean Amplop Partangiangan Keluarga, tu Huria :

Sian Keluarga : ..........................................................................

Godang na : ..........................................................................

II Kor 9:7b “Ai dihaholongi Debata do na las roha mangalehon!”.

Debata Mamasumasu