huria kristen batak protestan (hkbp) distrik xviii ...hkbpreformanda.org/artikel/acara 23 desember...
Post on 14-Jan-2020
37 Views
Preview:
TRANSCRIPT
1
HURIA KRISTEN BATAK PROTESTAN (HKBP)
DISTRIK XVIII JABARTENGDIY
ACARA NATAL KELUARGA
Senin, 23 Desember 2019
Tema : “Gabe Aleale Tu Saluhut Dongan Jolma” (Johannes 15:14-15 )
======================================================== Pangaradeon : Bibel, Lilin 4 buah.
Dipagalak ma lilin i di acara no 5
01. Dipungka ma acara marhite tangiang nahohom.
02. Marende BE. No. 48 : 1 – 2 “ Ria ma hita sasude”
➢ Ria ma hita sasude mamuji Debata,
Girgir ma parendeta be ai i do na tama, ai i do na tama.
➢ Di ungkap Debatanta i banuaginjang i,
Di suru do AnakNa i hangoluanta i, hangoluanta i. 03. Votum - Introitus - Tangiang (U=Uluan, K=Keluarga)
U : Marhitehite Goar ni Debata Ama, dohot Goar ni anakNa Tuhan Jesus
Kristus, dohot Goar ni Tondi Parbadia, na tumompa Langit dohot tano
on. Amen. Nunga tubu di hita sada posoposo, dilehon tu hita sada Anak,
pampe tu abaraNa do sogot harajaon, jala bahenonNa GoarNa:
K : Sipartahi halongangan, Ulubalang ni Debata Ama, saleleng ni lelengna, Raja
ni hadameon. U : Endehon hamu sada ende na imbaru di Jahowa, endehon ma Jahowa, ale
sandok tano on. Pajojor hamu ma di tongatonga ni angka sipelebegu
hamuliaonNa i, ditongatonga ni saluhut bangso halongangan, angka na binahenNa i. marsomba ma hamu tu Jahowa marpahean na marhadohoan,
angka hitir ma hamu maradophon Ibana, ale isi ni sandok tano on.
U : Martangiang ma hita : Ale Debata, Ama na di banua ginjang! Pujipujian, hasangapon dohot hamauliateon husombahon hami tu Ho, marningot
silehonlehonMi na balga i tu hami jolma na di pardangolan on, i ma
AnakMu, Jesus Kristus, na sinuruMi sian banua ginjang ala ni hami. Gabe na
dangol do Ibana jala na pogos, pola tubu Ibana di bara ni Betlehem, asa mamora hami. Sai rajai jala togutogu hami marhitehite TondiM, asa lam
huida hami godang ni holong ni rohaM na pinapatar ni AnakMi. Amen.
04. Marende BE. No : 62 : 4 “ Halalas ni roha godang”
➢ Sai sondangi ma rohangku, ale Tuhan Jesus i.
Asa dohot au maruli, di hatutubuMi. Hasangapon di Debata, laos dame, dame, dame ma di jolma.
Lomo ni roha ni Debata do hita jolma on.
2
05. Liturgi : (Responsoria) (P=Pemimpin, K=Keluarga) (Pagalak lilin)
Molo adong liturgi ni angka dakdanak boi dipatujolo.
Barita Hatutubu ni Jesus : Lukas 2 : 1 – 14
U : Dung i ro ma uju i parenta sian Kesar Augustus, ingkon suratan nasa jolma
digomgomanna. Pamilangon parjolo ma i, uju digomgomi si Kirenius tano
Siria. Jadi borhat ma sasude, asa disurati, ganup tu bona ni pinasana. K : Borhat ma nang si Josep, na sian Galilea, sian Nasaret, nangkok tu luat Judea,
tu huta ni si Daud, na margoar Betlehem, ala sian pomparan jala marga ni si
Daud Ibana, U : Pasurathon dirina rap dohot si Maria, oroanna i, naung gabegabean. Jadi di na
disini nasida, gok ma ari ni hangoluanna. Ditubuhon ma anak buhabajuna,
diborhos ma, dipeakkon ma tu bagasan panggagatan, ala so adong inganan na asing di parmianannasida. Jadi adong ma marborngin di ladang na disini
angka parmahan, mangingani pinahannasida.
K : Jadi didapothon sada surusuruan ma nasida, jala marsinondang ma sangap ni
Tuhan i humaliang nasida, gabe mabiar situtu ma. U : Alai didok surusuruan i ma tu nasida: Unang mabiar hamu; ai barita
halalas ni roha godang do huboan tu hamuna, parsaulian ni sandok bangso i.
K : Ai naung tubu do di hamu saborngin on, di huta ni si Daud, Sipalua i, ima Kristus, Tuhan i!
U : On ma partinandaan di hamu: Posoposo do dapotonmuna, na binorhos
peakdi panggagatan. Jala tompu ma adong dongan ni surusuruan i torop angka parangan parbanuaginjang, dipuji nasida do Debata, mandok:
K : Hasangapon ma di Debata di ginjang, dame ma di tano on, di angka jolma
halomoan i.
U : (Pagalak Lilin : marurutan sian natoras tu ianangkon baoa dohot boru
huhut mandok pandohan na di toru on) “ Sai marsinondang ma sondang
hatiuron na binoan ni Jesus Panondang i di tonga-tonga ni bagas on asa jumpa
dame nang las ni roha di bagas on.”
06. Marende BE. No. 54:1-2 “Sonang ni Bornginna i”
➢ Sonang ni borngin na i uju ro Jesus i; sonang modom do halak sude,
Holan dua na dungo do pe; mangingani AnakNa Jesus Tuhanta i. ➢ Denggan ni borngin na i, uju ro Jesus i; tu parmahan di betlehem i,
Dipaboa na di surgo i; Nunga ro Sipangolu Jesus Tuhanta i.
07. Renungan: Johannes 15 : 14-15
“ Alealengku ma hamuna, molo diula hamu na Hupatikkon i tu hamu. Ndang Hu
goar hamu anak somang, ai ndang diboto anak somang na niula ni indukna; aleale
do hamu Hudok, ai nungga Hupabotohon tu hamu saluhutna na hubege sian
Damang!”
3
Ari hatutubu ni Tuhan Jesus i ma barita las ni roha sian banua ginjang na pinasahat ni
suruan ni Debata tu angka Parmahan na di ladang Efrata. Barita ni Bibelta i mandok, adong do masa na muba ima sondang na mansai tiur situtu, pola do gabe tahutan angka parmahan i.
Barita na pinatolhas ni Bibelta i, masa sinondang natiur humaliang nasida, gabe mabiar
nasida. Ala ni ima marsoara ma Debata marhite angka suruan i, soara ni suruan i mandok asa
unang mabiar nasida. Boasa ndang porlu mabiar nasida, ai barita las ni roha do na pinasahat ni suruan i tu nasida, ima hatutubu ni Jesus Sipalua i. Tajalo ma hata ni Debata nuaeng asa
unang mabiar hita manguduti ngolunta. Nunga ro Debata mandongani hita ima Immanuel.
Debata na ngabe jolma I dibagasan Jesus ima na gabe patupahon haluaonta. Barita las ni roha hatutubu ni Kristus i, hasahatanna ima saluhut manisia, saluhut
rumatangga ni angka naporsea jala tu saluhut portibion. Marhite haroro ni Debata tu
portibion sian i ma tatanda lomo ni roha ni Debata di hita, asa saluhut do jolma, keluarga malua sian dosana be, malua sian biar ala ragam ni hamaolon, alai margogo ma maniop
Debata dohot mangulahon lomo ni rohaNa asa tu haluaon.
Jesus na tubu i, ima Sipalua. Lapatanna Jesus do na boi paluahon hita sian dosa jala
holan dibagasan Ibana do jumpang hita haluaon i. Ndang digoari Tuhan i be hita anak somang na so mamboto aha na niula ni indukna, alai nungga gabe alealeNa hita na umboto
aha na niula jala dipatupa Tuhan i tu hita jolma manisia. Ima siboan haluaon jala las ni roha
tu saluhut na porsea ni Ibana. Aha ma na dipangido Jesus tu hita songon naung gabe alealeNa hita? Tarida ma parjolo sian ngolu ni parumatanggaon siganup ari. Rumatangga na
targoar aleale ni Jesus ima: rumatangga na porsea di Jesus jala mangulahon lomo ni rohaNa.
Haporseaon di Jesus Sipalua i, dohot haunduhon ni keluarga di Jesus i, tarida do molo dibagasan rumatangga i adong tongtong dame jala siboan dame tu humaliangna, pataridahon
holong, jumpang pangajarion di hata ni Debata. Ganup ma mangula hombar tu hadirionna
be, isarana : Ia natoras mangula mangaramothon pardalanan ni rumatanggana hombar tu
Rumatangga ni naporsea, boi gabe aleale tu ianakhonna. Diramoti jala disarihon angka ianangkon diangka naringkot di ngoluna. Diajarhon ma angka parange nadenggan dingoluna
marhite hata ni Debata. Jongjong ma ibana songon malim manogihon rumatangga i
marsomba tu Debata, asa tau tiruan natoras tu ianangkon. Jala angka ianakhon unduk ma pasangaphon natorasna songon na nidok ni patik palimahon. Ingkon taparungkilhon do
godang angka rumatangga di zaman saonari on na “brokenhome”, ama tu ina ndang dapot be
dos ni roha gabe torop na marsirang unjungna ianakhon ma na gabe korban, natoras ndang
tau tiruan be tu ianakhon, ianakhon ndang unduk be tu natoras, na marhahamaranggi marbada alani arta portibi. Hape rumatangga i do gabe songon sada parsaoran, inganan
pangajarion dohot inganan martangiang tu Debata asa margogo nasa pangisina laho
mardalan lam tu dengganna muse jala boi gabe tiruan tu humaliang songon tanda naung gabe aleale ni Tuhan Jesus.
Paduahon, tarida ma sian parsaoran tu humaliang siganup ari. Jolma naung porsea jala
targoar aleale ni Jesus ingkon boi gabe siboan dame, gabe pasupasu tu humaliang: mangurupi angka na hurangan, manungkoli na marsak roha, margogoihon angka na gale,
dohot gabe las ni roha tu saluhut dongan jolma manang didia pe ibana mian. Dao ma roha
4
hosom, elat, teal, late, manang di zaman saonari on somal pangalaho na nidokna patupahon
“ujaran kebencian” dohot patupahon barita na so tutu (HOAX) asa gaor jala ro parbadaan. Ingkon boi do hita gabe pasupasu tu saluhut dongan jolma songon aleale ni Jesus na gabe
aleale ni saluhut jolma, jala tarida ma hamuliaon ni Tuhan Jesus marhite ngolunta hita.
Martua ma nasa jolma nang rumatangga na manjalo Jesus Sipalua i, ai nungga ro Ibana
tubu di portibi on dohot dibagasta pe asa boi gabe alealeNa hita. Marlasniroha mangula ulaonNa dohot mangolu dibagasan pangajarion dohot panoguooNa. Beta hita tajangkon ma
Ibana Sipalua naung ro tu portibi on. Amen.
08. Marende BE. No. 605 : 1 + 4 “Las Ma Roham” (P. Pelean tu Huria)
➢ Las ma roham Tuhanta ro; Gumomgom sasude Ungkap roham, jangkon rajam, marende ma sude,
Marende ma sude, Marende, Marende ma sude.
➢ Ibana do Rajanta i Parasiroha i,
Natigor i, na bonar i, parholong roha i,
Parholongroha i, Parholong, Parholongroha i.
09. Tangiang Panutup : Ale Amanami…..Amen..Amen..Amen. (Di endehon)
(Molo Partohonan do Manguluhon … dipasahat ma pasupasu, alai molo naso partohonan ndang pola dihatahon hata pasupasu)
PRAESES DOHOT SUDE PANGULA NA GOK TINGKI HKBP DISTRIK XVIII JABARTENGDIY
Pasahathon
Selamat Natal 25 Desember 2019
&
Tahun Baru 1 Januari 2020
top related